2016年9月20日 星期二

股神變吸血鬼?

on.cc東網專訊

【on.cc東網專訊】 未到萬聖節,股神巴菲特已經畀人話佢做咗吸血鬼。何解呢?皆因佢間旗艦公司巴郡旗下保險公司Applied Underwriters兩周前喺美國被速遞公司Breakaway Courier Systems告,仲索償1,800萬美元(約1.4億港元)。

間速遞公司話,幫襯保險公司諗住買個經濟實惠嘅勞工保險,點知變咗貴價嘅保上保......指控一大堆,仲話成件事直頭係個「龐氏騙局」。

「龐氏騙局」者,即係層壓式做法,靠不停有新投資者加入畀錢,以支付上線嘅投資者,加入者愈來愈多,到錢唔夠畀上線時,就爆煲。(仲唔明嘅自己上網搵!)

勞保點解同「龐氏騙局」有關?間速遞公司話「保上保」令啲員工互相Cover啲損失,若太多員工受傷索償時就會出問題。實情到底係點?唔知喎,都未開庭審。

股神巴菲特向來係全球公認嘅世界第一號慈善家,佢慳自己,但一到捐公益就好闊佬,直頭係成副身家咁捐,年年將巴郡股份捐去老友蓋茨個慈善基金度已成慣例。今 回慈善股神疑似做咗無良吸血鬼,唔知佢有冇個心Un住Un住呢?仲有,佢出名唔干預旗下公司運作,唔知今次會唔會主動睇睇咩事呢。

沒有留言: