2013年4月7日 星期日

實金去邊度買 ?

又寫多次呢個問題, 因為見到來緊會多好多人加入買實金保值行動, 而銀行會愈來愈缺貨 !

1. 中國銀行中環花園道總行和中國銀行中環永安大廈分行 : 加拿大有套楓葉金幣(9999)、 中國熊貓金幣(30克、15克、8克、3克、1克)、5両金條(99)、 長城10両銀條和加拿大有套楓葉1盎司銀幣(9999)

中國銀行金銀報價

中國銀行勝在金幣比其他行便宜, 而產品可以賣返俾有金屬交易的中國銀行就可以啦, 不須返中環賣, 而價錢按照牌價 。 要留意的是熊貓金幣, 因為銀行只回收當年幣, 就係賣緊個年份, 其他年份不回收, 還要留單據 ! 其他年份熊貓金幣可以賣俾其他幣店如 : 灣仔大洋金幣, 香港黃竹坑民生錢幣, 而呢兩間專賣中國金銀幣的幣店都有金/銀熊貓幣賣, 價格須自己去比較下, 雖然說是按照中銀牌價 。
LPM 也會回收舊年份金銀幣的。

2. 中環恒生銀行總行 : 加拿大楓葉金幣(9999)、 澳洲袋鼠金幣(9999)、 美國鷹楊金幣(9167), 南非富格林金幣(916)、 財神金牌、 5両金條(99或9999)、 但無實銀賣

恒生銀行金銀報價

恒生銀行最便宜是南非1盎司富格林金幣, 一枚可以平過其他1盎司金幣成五/六百蚊(因為富格林多銅, 所以表面偏啡) 。(澳洲1盎司袋鼠金幣和美國1盎司鷹楊金幣就貴過中國銀行的有套1盎司楓葉金幣約一百幾蚊)其實現在中銀和上商的牌價上, 1盎司金幣己貴過恒生, 而差價都拉寬咗 。聽說美國鷹楊比其他金幣重少少, 因為送咗少少銀 !
呢D金幣都有半盎司、 1/4盎司、1/10盎司的賣, 不過恒生牌價就唔寫出來, 極唔方便 ! 所以想買就要開口問職員 ! 最靚是澳洲袋鼠金幣, 因為是9999金又年年唔同圖案, 當收藏收集好適宜 !
想賣金幣, 都不須返中環, 而可以去任何一間恒生銀行賣 。

3. 上海商業銀行: 一両金粒(9999)、5両金條(9999)、 澳洲袋鼠金幣和加拿大楓葉金幣(金幣只有總行先有得賣)

見到好多媽媽會去呢間銀行買一両金粒, 因為多間分行都有金粒賣 !
想賣金粒/幣都可以賣返俾上海商業銀行或去忠記都可以, 須自行問價錢比較下 !

上海商業銀行金價報價


朋友來電郵說 :
上海商業金粒我買過, 請你告知大家, 要保留單據, 是上海商業的職員同我講, 將來賣出也要看單據, 方便她們查. 我在沙田分行買, 張單據是手寫的, 上有我名字. 我最後是去年1月買, 以後沒買過, 因為我不喜歡對方在一本紅黑硬皮部上記錄我名字, 何年何月何日買入, 買入價, 數量等等, 買得多, 我就覺得極不方便 !

本人去問過, 買時不用有戶口, 但要留身份証資料, 而開單會寫上姓名 ! 賣出時就不須要單據, 因為塊金粒是用密封軟膠包實 !

4.華僑永亨銀行總行和一些分行: 5両普製9999金條(暫時無金銀業貿易場的普製9999金條賣, 有的是永豐9999金條和黃沙9999金條), 還有5両精裝9999金銀業貿易場金條和1両精裝9999金銀業貿易場金條 
 
金價報價 www.ocbcwhhk.com

精裝金銀業質易場5両9999金條, 貴成 600蚊1両, 就係一條要貴成 3000蚊 !
精裝金銀業質易場1両9999金條比5両裝還要貴多200蚊 !
就係因為貴, 所以精裝金銀業質易場5両裝有軟膠包住和1両裝9999金條有透明長形硬膠盒包住和有靚禮盒和証明書送 !
華僑永亨須你保留單據, 才可以回收 !
華僑永亨買金須開戶口, 而戶口內一定要保持有 5000蚊和一年內要運用最少一次 !

5両裝9999精裝金銀業質易場金條和1両裝9999精裝金銀業質易場金條金城金條有限公司都有賣, 而依家平咗好多 www.goldbar.com.hk, 對比永亨銀行只差幾十蚊 !

5. 上環利昌金行自家金粒, 銀粒和銀條: 金粒有半両和一両、 銀粒有一両、 而銀條有四両裝和500克裝

缺點是自家牌表面無廠貨靚, 而拿去外國賣人地沒必會買, 所以送禮或收藏, 大家都會選貴些的廠貨 。

想賣可以賣返俾利昌或去忠記溶都可以 !

6. 如果以上地方都買唔到實貨, 大家都可以去外國公司如LPMKitco 買實金實銀, 雖然金幣價格會貴過銀行, 但在銀行買唔到貨時, 是一個可以買到金幣的地方, 何況佢地的投資銀幣都唔貴 !

7. 想買特別幣或新上市幣的朋友, 就可以幫襯我地網友SCS搞的團購啦, 可以平價買到心愛的金銀幣 !

8. 如果都係買唔到, 咁就要去金舖買金飾或金粒啦, 雖然金舖的金溢價最高, 但一定有間在你屋企附近 !

周大福有1両金粒或5両金條賣(好似佢地唔再有金粒), 而周生生只有地舖先有金粒/金條賣 !
金舖金粒/金條有自己牌價, 平過飾金價, 但買時一定要用現金或PPS !
金飾價是最貴, 但好處是可以簽卡儲積分, 而有些卡如中銀卡, 積分又可以在某些金舖當現金扣金飾價, 所以感覺上是好著數 !
(因為自己通常在大金行買金飾, 所以唔記得說, 只有大金行先收信用卡, 而細金舖唔收或須加3%手續費 !)

註:
1盎司(oz)=0.831両=31.1035克(gram)
1両=37.429克(gram)=1.20337盎司(oz)

溢價 = 貴過本來純金(銀)價幾多, 可以用7.8x美元一盎司現金價來計, 再全部轉去1克就可以計到出來邊隻實貨是最便宜, 不過便宜唔代表你可以買得到, 因為多人買

999/9999 代表金幣/條或銀幣/條的純度,數愈大,幣就愈軟愈易花,因為純度高,而數愈小,幣就愈硬,因為加咗好多銅, 不過金或銀幣有幾多盎司,就會有幾多盎司金或銀在內

金銀幣上面的面值代表乜野 ? 請睇以前寫落的

幣和章的分別


America the Beautiful vs Canadian Queen Jubilee


忠記在上環(可以睇Joe網和 honson 網誌), 專溶實金實銀, 因為唔收火秏費和佣金, 所以回返的錢會高過金舖

中銀和恒生已限定只賣金銀幣俾本身銀行客戶, 所以想買一定要先開銀行戶口 !

 金條回收:
上商一両9999金粒只可以賣返俾上商, 但99/9999五両金條(牌子:永豐/黃沙/寶生/金銀貿易場)恒生都收, 中銀就唔知要唔要收據, 華橋永亨就要收據先回收 ! 

2019年2月3日寫: 

本人因為想買多間自住樓, 所以先要集齊買樓資金, 除了沽出人民幣外, 還要沽出一些實金, 所以乘金價上升, 慢慢把在7800-9000蚊一両買入的實金沽出 !

賣實金的麻煩是唔會一次過大量沽出, 怕帶太多錢在身俾人搶, 所以好彩買入個時己計算到出貨的情形, 當時選買一両一粒的金粒而唔係5両的金條, 可以一粒粒咁賣 ! 所以買5両金條唔好去金舖買, 而去銀行買, 因為沽出時, 可以直轉入銀行戶口 !

當年因為金粒太搶手, 大家都唔多明金舖點解會無金粒賣 ?  依家賣出金粒才搞個明白, 因為金舖會把你交來的金粒, 先剪掉保護膠套, 再把金粒燒成兩半, 可能為預防買到假金, 可以見到個芯 ! 咁樣粒金粒就唔可以再賣出去了, 而要返去溶金工場 !

73 則留言:

Lisa 提到...

剛才出去親友食飯, 叔仔突然問: 買金好唔好 ?

睇來身邊人開始留意黃金啦 !

CK 提到...

Lisa, 係多人問有關黃金的事, 不過係paper gold & ETF gold 呢, 實金始終太難行出第一步

honson 提到...

近期焦點回落在黃金身上,
看看大眾對黃金的熱情,
持久力有多久先?

Lisa 提到...

係呀,
我叔仔都要知買乜好 D, 而我當然說是一塊塊的實金 !
老公侄仔都買咗紙黃金 !

Lisa 提到...

其實依家先行緊牛二, 所以D人還有好多疑問, 而到牛三, D人會反過來俾意見你 XDDD !

Lisa 提到...

回wahd,
呢間好耐啦, 不過金幣價錢貴過銀行, 所以沒上過去買過野, 而我依家主要買一些少有的收藏幣 :)

Macy 提到...

Macy身邊都有朋輩問關於買金銀幣作為儲蓄/投資的事宜,不過Macy只懂"喜歡"就買不懂儲蓄/投資,所以給了Lisa姐和Jo達人的網誌他們參考參考 !!^^

Lisa 提到...

回Macy,

睇來金市已進入牛市二期, 所以多人開始留意金有投資價值 !
在牛市一期, D 人只會有負面睇法, 所以會沽出多過買入 !
到了牛市三期, 好多人會變專家, 會倒過來教你投資 ! 到時無人會有問題, 只會叫你快 D 去買因為實賺 XDDD !

Unknown 提到...

到個陣時就係差唔多離場時間了。

Eric 提到...

想問中銀信用咭分可以去金鋪用?

Lisa 提到...

回Eric,
好似得兩間: 六福和CSS http://www.cssjewellery.com/
可以去問下先 ! 200分當1蚊使 !

Eric 提到...

Thank you。

- 提到...

聽講9999金條好難買

中銀冇貨,上商貴少少

隔離金甲蟲之路都係貫99金條

Unknown 提到...

想請教購買銀幣的溢價多少才算合理?
我在LPM看到同樣是1盎司的銀幣,加拿大楓葉銀幣1盎司的價格是$209.19(當時銀價是US23.31)以對換價來說溢價是$27.96 ($209.19 - US23.31 x 7.78)
但2013澳洲笑翠鳥銀幣的價錢卻是$230.11?
那怎樣的溢價才公道?

Lisa 提到...

回Lincoln Ho,
無話公唔公道的 !
加拿大楓葉銀幣, 純度雖然是9999, 不過年年同一個圖案無限量發行, 而澳洲笑翠鳥, 純度是999, 不過年年唔同的圖案設計, 又限量發行, 2013是一百萬枚, 又有原廠膠盒附送 !
所以按自己喜好去購買 !

Unknown 提到...

明白,謝謝回覆。
那樣說,投資銀幣有點像集郵,除了面值之外還有其他供求因素考慮。
而價格未必緊貼銀價,所以只適合用閑錢作長缐投資吧。

Unknown 提到...

請實銀是指真正的銀幣或銀條,而 paper silver 是指銀行的貴金屬戶口嗎?對不起,新手一名....

另若買銀幣或銀條,需要特別處理嗎?撇除保安因素,放在家裏可以嗎?

謝謝!

Lisa 提到...

回Clara Yeung,
實金銀是指, 可以拿在手上的金銀: 金銀條/金銀章, 金銀幣, 金銀首飾, 金器銀器都是實金實銀 !
而俾咗錢又唔可以有金銀拿在手的全是紙金紙銀 !
就算妳買咗實金銀又放人地個倉度, 只收返收據, 就由實金銀變咗紙金銀 !
其他好好去睇本網誌成個[投資金銀手冊]學基本知識 !

Unknown 提到...

謝謝 Lisa,那請問賣買紙銀有何睇法?

Lisa 提到...

回Clara Yeung,
睇來妳沒好好去睇[投資金銀手冊], 沒知點解要買實金實銀 !

Unknown 提到...

Dear Lisa,

我有睇過呀,但煩惱在如何儲存實金實銀呀!

謝謝!

Lisa 提到...

回Clara Yeung,
實金實銀一定要放在最安全的地方, 而暫時銀行保管箱還是最安全 !
近年多咗爆竊案和甲萬黨, 所以家俱保安不可以勿視 !

Unknown 提到...

Dear Lisa,
我想問下忠記有沒有自家製金粒 OR 金粒。 因為我發現家人收藏的金粒中除左利昌金粒外,還有一粒印有忠記9999的金粒。

Lisa 提到...

回Ka meng Choi,

我沒去過忠記, 不過老店佢以前有賣金粒都唔出奇 ! 想清楚D可以去忠記問 :)

- 提到...

請問中銀都有鷹揚/袋鼠?

另外想請教下其他金幣如愛樂,不列顛女神香港有得賣嗎?

Lisa 提到...

回Ansel Leung,
睇來你沒用心去睇我寫的文, 而也無專心睇各網店的貨 :)
中銀金幣來說, 只賣金楓葉和金熊貓 !
恒生先有金袋鼠和金鷹楊和金富格林 !
金愛樂可以去Kitco(暫無貨)或apmex買 !
金不列顛女神去LPM(暫無貨)或apmex買 !

- 提到...

D字太密睇錯哈哈

Lisa 提到...

回Ansel Leung,
恒生唔係成日有貨, 要有客放咗才有, 所以最好打個電話問下先就唔曬白行 :)

- 提到...

聽講恆生的金幣冇套的,味要金睛火眼睇清楚?

花左收唔收?同埋我去kitco買左去恆生放得唔得?

諗住買1/2oz鷹揚

Lisa 提到...

回Ansel Leung,

唔想買到花幣就要問佢有無2013年的新幣啦 ! 如澳洲金袋鼠, 就有膠盒裝住的 !
你在Kitco 買金幣, 當然可以去恒生賣啦 !

花左收唔收?
去銀行問啦, 因為我唔識答你 !

- 提到...

咁鬼平,但kico買賣價唔得,lpm/swiss回收煩,booksilver/金城成日冇貨,外國買回收時麻煩,去邊好?
幾秒前 · 讚好

Lisa 提到...

回Ansel Leung,

我一早說過, 金銀幣是睇十年八年, 是長線投資來的 ! 如果價升, 到時大把人出來同你收, 不過太短線, 想賣靚幣搵SCS或SPC啦, 而殘或花幣去忠記溶咗佢啦 !

- 提到...

忠記回收價係幾多?

Lisa 提到...

回Ansel Leung,

都說去溶金溶銀囉, 緊係純金純銀價啦 :)

- 提到...

原來booksilver有金愛樂,最美金幣

Lisa 提到...

回Ansel Leung,

Book Silver 比中銀貴, 所以好少去睇有乜貨 :)
依家佢賣價 1oz金幣是 10,555
而中銀有套1oz金楓葉 10,121, 1oz金熊貓 10,096, 所以金幣我會去銀行買 !

- 提到...

請問知唔知邊到有平的幣盒賣?

唔駛燈塔牌

Lisa 提到...

回Ansel Leung,

淘寶 !
如果是靚銀幣, 還是建議你用燈塔牌, 因為耐用D同對銀幣無咁大傷害 !

- 提到...

但淘寶運費都幾貴

- 提到...

lisa 姐有冇2 oz 同5 oz 幣推介?

Lisa 提到...

回Ansel Leung,
澳洲生肖, 墨西哥天使有2oz和5oz
美國5oz ATB

- 提到...

我同你的選擇都差不多

perth有樹熊,笑翠同生肖都ok

墨西哥天使2安士ok,不過5oz唔知做咩好貴,unc同proof版一樣價

atb買左隻,但apmex果D唔同mint出的unc版,比較反光,暫時唔再入

海龜同方舟麻麻地

仲有冇其他介紹?thanks:)

Lisa 提到...

回Ansel Leung,

差不多啦 !
5oz 貴, 因為少人買, 所以也發行量少 !
不如買 10oz 啦, 價接近 spot !

- 提到...

其實我主要想買2安士,近排好喜歡D厚身的幣

10安士有咩好介紹?我冇咩睇10安士

Lisa 提到...

回Ansel Leung,

除咗墨西哥天使和海龜, 你講的個幾隻都有10oz !

- 提到...

lisa姐近期有冇買幣呀?:)

又有團購啦播呵呵

Lisa 提到...

回Ansel Leung,

剛剛訂咗 :)
唔想在網上講買乜, 因為好快俾人掃光 XD !

- 提到...

收到貨可以分享下哈哈

Lisa 提到...

回Ansel Leung,

咁你要留意下本網誌[收藏幣介紹]和[投資金銀手冊]啦, 因為我唔會再放在第一頁, 我老公見到就知我又買金銀幣啦 XDDD !

Ivan 提到...

想請教一下,若一定要簽咭,但又唔想買飾金,有乜方法?謝謝

Lisa 提到...

回Ivan,

簽卡只可以用來買金飾, 鑽石首飾和手錶等等, 金粒和金條就唔得囉, 一定要用現金 !

Ivan 提到...

Thanks a lot!

Unknown 提到...

請問個人客戶可以去忠記溶金, 又可否去忠記買金?在忠記買的金可以在其他金鋪出售嗎?

Lisa 提到...

回Zhi Ying Chen,

忠記是一間熔金店, 所以會回收所有實金和實銀, 而佢地可能會有賣黃金產品, 不過唔係全部產品金舖會接受; 金舖會在收第三行的金器須扣火耗費 !

Unknown 提到...

Lisa,,請問有咩方法可以聯絡到妳呢?

Lisa 提到...

luckyme at netvigator.com

Dennis 提到...

這郵箱 luckyme@netvigator.com 是否可以聯絡到你呢?

Lisa 提到...

可以 :)

Eric Chan 提到...

邊一間銀行收冇套嘅楓葉金幣?謝謝!

Lisa 提到...

恒生銀行

Eric Chan 提到...

如果恆生賣其他公司嘅金呢?例如賀利氏,係咪只有忠記會回收?

Lisa 提到...

恒生都好似只收佢地有賣的黃金產品, 其他產品可以去忠記, LPM 等等貴金屬店賣 !

Unknown 提到...

咁係咪有"香港金銀業貿易場"標記係香港其他銀行或金鋪都可以賣出?定只係原本購入地方?

Lisa 提到...

"香港金銀業貿易場"5両普製金條, 可以賣俾恒生, 上商, 華橋永亨(要收據), 忠記......
"香港金銀業貿易場"5両精製金條和1両精製金塊是收藏品, 可以試下賣俾金舖或幣店 !

doergo 提到...

LISA 你好,請問有沒有在BOOKSILVER買過實金和實銀?他們的楓葉銀幣較KITCO平,不知道是否可靠。。

Lisa 提到...

我依家好少買楓葉銀幣, 所以也沒去過Booksilver.

doergo 提到...

明白,謝謝回覆。

Unknown 提到...

香港金銀业貿昜場 五両普制金條 在那里買到

Lisa 提到...

可以去香港金銀業貿昜場試下 !

Wong Kin Ching 提到...

Hi Lisa, 本人容易亂花錢,如果只為儲蓄和保值在保險箱以作將來養老之用,你會建議買入那款實金呢?謝謝!

Lisa 提到...

自己睇 : 投資金銀手冊
http://investtalk-lisa.blogspot.hk/search/label/%E6%8A%95%E8%B3%87%E9%87%91%E9%8A%80%E6%89%8B%E5%86%8A

先來決定 :)

Unknown 提到...

想問LISA現在是否啱買入實金?在哪里買比較穩陣

Lisa 提到...

呢度已寫清楚, 實金去邊度買 :)

其他自己睇:投資黃金

https://investtalk-lisa.blogspot.com/search/label/%E6%8A%95%E8%B3%87%E9%BB%83%E9%87%91